આ કોની મનોરમ દ્રષ્ટિથી – ગની દહીંવાલા
સ્વરકાર:પુરષોત્તમ ઉપાધ્યાય
સ્વર:પુરષોત્તમ ઉપાધ્યાય
Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.
આ કોની મનોરમ દ્રષ્ટિથી આકાશનું અંતર ભીજાણું?
ધરતીએ જતનથી ઓઢેલું નવલું નીલાંબર ભીજાણું.
આ ઇન્દ્રધનુંની પિચકારી કાં સપ્તરંગમાં ઝબકોળી,
ફાગણ નહીં આતો શ્રાવણ છે ને એમાં રમી લીધી હોળી.
છંટાઈ ગયા ખુદ વ્યોમ સમું, ધરતી અનુવસ્ત્ર ભીજાણું,
ધરતીએ જતનથી ઓઢેલું નવલું નીલાંબર ભીજાણું.
કાળી કાળી જલપરીઓની આંખોમાં વીજના ચમકારા,
ત્યાં દૂર ક્ષિતિજે દેખાતા આ કોની આંખના અણસારા?
શી હર્ષાશ્રુની હેલી કે ધરતીનું કલેવળ ભીજાણું,
ધરતીએ જતનથી ઓઢેલું નવલું નીલાંબર ભીજાણું.
આ રસભીની એકલતામાં સાનિધ્યનો સાંજ સંભવ છે,
ફોરાંની મૃદુ પાયલ સાથે આ કોનો મંજુલ પગરવ છે?
આનંદના ઉઘડ્યા દરવાજા આખું રે ઘર આ ભીજાણું,
ધરતીએ જતનથી ઓઢેલું નવલું નીલાંબર ભીજાણું.
વાહ! ગની દહીંવાલા અને પુરષોત્તમ ઉપાધ્યાય નો સંગમ એટલે સ્વર્ગ!
ગુજરાતી સુગમ સંગીત ના પરમ સાધક, પ્રાણ સ્વરૂપ અને સાચા અર્થ માં પિતા તુલ્ય એવા પ્રિય મિત્ર અને પરમ સ્નેહી ભાઈ શ્રી પુરુષોત્તમ ઉપાધ્યાય જી ને ગુજરાતી કવિતા ના સ્વર માં પ્રાણ પુરતા સૂર સાધી ને સ્વકંઠે ગાતા સાંભળવા એ એક અનોખો લ્હાવો છે.
અમારું કુટુંબ એટલું ભાગ્યશાળી છે કે અમે છેલ્લા ત્રણ દાયકા થી આ રસલ્હાણ માં તરબોળ થઇ ને જીવીએ છીએ. અમારા બાળકો, અમેરિકા માં જન્મ્યા હોવા છતાં, પુરુષોત્તમ ઉપાધ્યાય ની વરસોવરસ ના સાનિધ્ય અને કુટુંબીજન જેવી મિત્રતા અને પ્રેમ ને લીધે, ગુજરાતી ભાષા અને ગુજરાતી સુગમ સંગીત નો સમઝ પૂર્વક આનંદ લઇ શકે છે, લે છે, તે માટે અમે સહુ વ્યક્તિગત રીતે પરમ સ્નેહી શ્રી પુરુષોત્તમ ઉપાધ્યાય ના આજન્મ આભારી અને ઋણી છીએ અને રહીશું.
ગુજરાત અને ગુજરાતીઓ ગુજરાત ના ગૌરવ સ્વરૂપ આ પરમ સાધક અને સંગીતકાર ના “યાવ્ચન્દ્રદીવાકરો” સુધી ઋણી રહેશે. પુરુષોત્તમ સંગીત અને પુરુષોત્તમ ઉપાધ્યાય ને અમરતા માટે પરમ કૃપાળુ પરમાત્મા ને હાર્દિક પ્રાર્થના. હરિઃ ઓમ.
અશોક અને સુધા ભટ્ટ, શિવાંગી ભટ્ટ, સંદીપ ભટ્ટ અને સુજાતા મોદી – ૧૦ સપ્ટેમ્બર, ૨૦૧૩