આજની વ્યસ્ત જિંદગીમાં આપણી પાસે મા-બાપને યાદ કરવા કે તેમની સાથે બેસી બે વાત કરવા જેટલો સમય નથી. એટલે જ આજ-કાલ બધા ‘મધર્સ ડે’ ને ‘ફાધર્સ ડે’ જેવા દિવસો પર કાર્ડ કે ફૂલો આપી મા-બાપ પ્રત્યેની પોતાની જવાબદારી પુરી કર્યાનો સંતોષ માને છે. પરંતુ હકિકતમાં તેઓ આપણો સાથ અને સહવાસ ઝંખતા હોય છે. તેમને જરૂર છે આપણી હૂંફ અને લાગણીની. તો ચાલો આજે આ સુંદર અને આંખ ઉઘાડી નાખતી રચના સાંભળી ને આપણા અંતરાત્માને સવાલ કરી લઇએ કે ક્યાંક આપણે આ દોડતી-ભાગતી જિંદગીની ઘટમાળમાં મા-બાપને ભૂલી તો નથી ગયાને?

સ્વર: શૈલેન્દ્ર ભારતી

ભૂલો ભલે બીજું બધું, મા બાપને ભૂલશો નહિ
અગણિત છે ઉપકાર એના, એહ વિસરશો નહિ

પથ્થર પૂજ્યા પૃથ્વી તણા, ત્યારે દીઠું તમ મુખડું
એ પુનિત જનનાં કાળજાં, પથ્થર બની છુંદશો નહિ

કાઢી મુખેથી કોળીયા, મ્હોંમાં દઈ મોટા કર્યા
અમૃત તણાં દેનાર સામે, ઝેર ઉગળશો નહિ

લાખો લડાવ્યાં લાડ તમને, કોડ સૌ પુરા કર્યા
એ કોડના પુરનારના, આ કોડને ભૂલશો નહિ

લાખો કમાતા હો ભલે, મા બાપ જેથી ના ઠર્યા
એ લાખ નહિ પણ રાખ છે, એ માનવું ભૂલશો નહિ

સંતાનથી સેવા ચાહો, સંતાન છો સેવા કરો
જેવું કરો તેવું ભરો, એ ભાવના ભૂલશો નહિ

ભીને સૂઈ પોતે અને, સુકે સુવડાવ્યા આપને
એ અમીમય આંખને, ભૂલીને ભીંજવશો નહિ

પુષ્પો બિછાવ્યાં પ્રેમથી, જેણે તમારા રાહ પર
એ રાહબરના રાહ પર, કંટક કદી બનશો નહિ

ધન ખરચતાં મળશે બધું, માતા પિતા મળશે નહિ
પળ પળ પુનિત એ ચરણની, ચાહના ભૂલશો નહિ.

સ્વર: ભાસ્કર શુક્લ

સમય મારો સાધજે વ્હાલા, કરું હું તો કાલાવાલા
સમય મારો સાધજે વ્હાલા, કરું હું તો કાલાવાલા

અંત સમય મારો આવશે ને, નહિ દેહનું રહે ભાન
એવે સમય મુખ તુલસી દેજે, દેજે યમુના પાન … સમય મારો

જીભલડી મારી પરવશ બનશે, હારી બેસીશ હું હામ,
એવે સમય મારે વ્હારે ચડીને, મુખે રાખજે તારું નામ … સમય મારો

કંઠ રુંધાશે ને નાડિયું તૂટે, તૂટે જીવનનો દોર,
એવે સમય મારા અલબેલાજી, કરજે બંસીનો સૂર … સમય મારો

આંખલડી મારી પાવન કરજે, દેજે એક જ ધ્યાન,
શ્યામસુંદર તારી ઝાંખી કરીને, ‘પુનિત’ છોડે પ્રાણ … સમય મારો