સ્વર: પાર્થિવ ગોહિલ અને સમુહ

વૃક્ષ વૃક્ષ ને ડાળ ડાળ ને પાન પાન ને ફૂલ ફૂલમાં નર્તન,
મારી ધરતી કેવી મલકે… મારી ધરતી કેવી મલકે…
વૃક્ષ વૃક્ષ ને ડાળ ડાળ ને પાન પાન ને ફૂલ ફૂલમાં નર્તન.

આખા તે આકાશ વિષે આ સ્વરનાં સોનલ સાવ સુકોમળ સ્પંદન,
મારો સાગર કેવો છલકે… મારો સાગર કેવો છલકે…
વૃક્ષ વૃક્ષ ને ડાળ ડાળ ને પાન પાન ને ફૂલ ફૂલમાં નર્તન.

હું મારા એક અંકુરેથી વૃક્ષ થઈને વેરું લીલાં ટહુકા,
હું મારું એક જલબીદું થઈ, સાગર થઈ તરતી રાખું નૌકા,
હું મારું એક આભ થઈને ઉજળો ઉજળો તડકો ઓઢી મ્હાલું,
હળવે હળવે ચંદ્ર-કિરણનું પિચ્છ ફેરવું પાંપણ ઉપર સુંવાળું,
હું મારું એક ગીત ગાઉ છું તારે માટે મારા લાખ ઉમળકે,
મારી ધરતી કેવી મલકે… મારો સાગર કેવો છલકે…
વૃક્ષ વૃક્ષ ને ડાળ ડાળ ને પાન પાન ને ફૂલ ફૂલમાં નર્તન.

સ્વર: પાર્થિવ ગોહિલ

મારી કોઈ ડાળખીમાં પાંદડા નથી
મને પાનખરની બીક ના બતાવો !

પંખી સહિત હવા ચાતરીને જાય
એવું અષાઢી દિવસોમાં લાગે,
આંબાનું સાવ ભલે લાકડું કહેવાઉં
પણ મારામાં ઝાડ હજી જાગે.

માળામાં ગોઠવેલી સળી હું નથી
મને વીજળીની બીક ના બતાવો !

એકે ડાળીથી હવે ઝીલ્યો ન જાય
કોઈ રાતી કીડીનોય ભાર !
એક પછી એક ડાળ ખરતી જોઉં ને થાય
પડવાને છે કેટલી વાર ?

બરફમાં હું ગોઠવેલું પાણી નથી
મને સૂરજની બીક ના બતાવો !
————————
આભાર : લયસ્તરો

સ્વર: પાર્થિવ ગોહિલ, જહાનવી શ્રીમાંનકર

મોતની યે બાદ તારી ઝંખના કરતો રહ્યો
કે તું જન્નતમાં મળે એવી દુઆ કરતો રહ્યો

જો તું જાણે તો ભરી મહેફીલ ત્યજીને સાથ દઇ
એવી એકલતા ભરી મારી દશા કરતો રહ્યો

એ હતો એક મોહ કે રહેશું જીવનભર સાથમાં
વ્હેમ તો એજ છે જે આપણને જુદાં કરતો રહ્યો

કોણ જાણે શું હતું એનાં નીકળતાં શ્વાસમાં
માનવી આ સૃષ્ટિની ઝેરી હવા કરતો રહ્યો

[audio src="http://rankaar.com/audio/GeetGulabi/Aeva Re Man Na Mel.mp3"]

સ્વરાંકન: રાસબિહારી દેસાઈ
સ્વર: દીક્ષિત શરદ, ચિત્રા શરદ

કેવા રે મળેલા મનનાં મેળ, રુદિયાના રાજા,
કેવા રે મળેલા મનનાં મેળ…

ચોકમાં ગુંથાય જેવી ચાંદરણાની જાળી,
જેવી માંડવે વિંટાયે નાગરવેલ, રુદિયાની રાણી,
કેવા રે મળેલા મનનાં મેળ…

તુંબુર ને જંતરની વાણી, હેજી કાંઠા ને સરીતાના પાણી,
ગોધાણાની ઘંટડીએ સોહે સંધ્યા રે, રુદિયાના રાજા,
કેવા રે મળેલા મનનાં મેળ…

સંગનો ઉમંગ માણી, હેજી જિંદગીને જીવી જાણી,
એક રે ક્યારામાં જેવા ઝુક્યાં ચંપો-કેળ, રુદિયાની રાણી,
કેવા રે મળેલા મનનાં મેળ…