Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

દોસ્ત એટલો જ ફરક છે,
આ અગરબત્તીને માણસમાં
એક બળીને સુગંધ આપે છે,
એક સુગંધ જોઈને બળે છે.
– “દોસ્ત”

ખરું કહું તો એ કંટક નથી, ગુલાબ નથી
જીવન જીવન છે, જીવનનો કશો જવાબ નથી

ખરાબ દ્રષ્ટિથી ભાસે છે, સારૂં વિશ્વ ખરાબ
નજર ખરાબ નથી તો, કોઈ ખરાબ નથી

તને પીતાં નથી આવડતો, મુર્ખ મન મારા
પદાર્થ એવો કયો છે, કે જે શરાબ નથી

વિજય પરસ્તને, “ઘાયલ”, હું કેમ સમજાવું?
કે કામિયાબ હકીકતમાં, કામિયાબ નથી.

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

ચાલ સાથે બેસી કાગળ વાંચીએ
વીત્યાં વર્ષોની, પળેપળ વાંચીએ

છે જુનો કાગળને, ઝાંખા અક્ષરો
કાળજીથી ખોલીને, સળ વાંચીએ

પત્ર સૌ પીળા પડ્યા, તો શું થયું
તાજે તાજું છાંટી, ઝાકળ વાંચીએ

કેમ તું રહીરહીને, અટકી જાય છે
મન કરી કઠ્ઠણને, આગળ વાંચીએ

માત્ર આ પત્રો, સીલકમાં રહી ગયા
કંઈ નથી આગળ, તો પાછળ વાંચીએ

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

દીકરી મારી લાડકવાયી લક્ષ્મીનો અવતાર
એ સૂએ તો રાત પડે ને જાગે તો સવાર
દીકરી મારી..

દીકરી તારા વ્હાલનો દરિયો જીવનભર છલકાય
પામતા જીવન માત-પિતાનું ધન્ય થઈ જાય
એક જ સ્મિતમાં તારા ચમકે મોતીડાં હાજર
દીકરી મારી..

ઢીંગલા સાથે રમતી ઢીંગલી જેવું મારું બાળ
રમતા થાકીને ભૂખ લાગે તો ખીર રાખું તૈયાર
રૂપમાં તારા લાગે મને પરીનો અણસાર
દીકરી મારી..

કાળી ઘેલી વાણીથી ઘર ઘૂઘરો થઈ ને ગુંજે
પા-પા પગલી ચલાવતા બાપનું હૈયું ઝૂમે
દીકરી તું તો માત-પિતાનો સાચો છે આધાર
દીકરી મારી..

હૈયાના ઝૂલે હેતની દોરી બાંધી તને ઝૂલવું
હાલરડાની રેશ્મી રજાઈ તને હું ઓઢાડું
પાવન પગલે તારા મારો ઉજળો છે સંસાર
દીકરી મારી..