આ નભ ઝૂક્યું તે કાનજી… – પ્રિયકાંત મણિયાર

આલ્બમ: આંખે કંકુના સુરજ આથમ્યા

આ નભ ઝૂક્યું તે કાનજી ને ચાંદની તે રાધા રે,
આ સરવરજળ તે કાનજી ને પોયણી તે રાધા રે,
આ નભ ઝૂક્યું તે કાનજી…

આ બાગ ખીલ્યો તે કાનજી ને લ્હેરી જતી તે રાધા રે,
આ પરવત-શિખર કાનજી ને કેડી ચડે તે રાધા રે,
આ નભ ઝૂક્યું તે કાનજી…

આ ચાલ્યાં ચરણ તે કાનજી પગલી પડે તે તે રાધા રે,
આ કેશ ગૂંથ્યા તે કાનજી ને સેંથી પૂરી તે રાધા રે,
આ નભ ઝૂક્યું તે કાનજી…

આ દીપ જલે તે કાનજી ને આરતી તે રાધા રે,
આ લોચન મારાં કાનજી ને નજરું જુએ તે રાધા રે !
આ નભ ઝૂક્યું તે કાનજી…