આકાશે ધોધમાર – અંકિત ત્રિવેદી

આલ્બમ:સમન્વય ૨૦૦૯
સ્વરકાર:નયનેશ જાની
સ્વર:તેજસ ધોળકિયા, પ્રાચી શાહ



આકાશે ધોધમાર બંધાતા રોજ
તોય ઈચ્છા વિનાના સાવ પાંગળા,
આપનો સબંધ જાણે
વરસ્યા વિનાના રહ્યાં વાદળા.

કોડિયામાં પ્રગટેલા અજવાળા જેમ
એકબીજામાં ઝળહળતા આપણે.
અજવાળું ઓલવીને કેમ કરી મોકલેલું
શરતોનું સરનામું પાંપણે.
શમણાના તૂટવામાં એવું લાગે કે જાણે
હાથમાંથી છૂટાં પડ્યા આંગળા.

અંતરથી અંતર જો માપો તો આમ
અમે પાસે ને આમ દૂર દૂર,
કિનારે પહોચેલાં મોજાની જેમ અમે
દરિયાથી છૂટવા આતુર.
ચહેરાના ભાવ બધા વાંચી શકાયે
તોયે આંખોને લાગે કે આંધળા.

નાછૂટકે લેવાતા શ્વાસોમાં વર્તાતી
સંગાથે જીવ્યાની ભૂલ,
આપણા જ ક્યારામાં આપને જ વાવેલું
સુગંધ વિનાનું એક ફૂલ.
સાથે રહ્યાની વાત ભૂલી જઈને
આજ છૂટાં પડવાને ઉતાવળા.

Please follow and like us:
Pin Share
  1. May 20th, 2010 at 07:00 | #1

    સુંદર ગીત અને ગાયકી…

  2. May 20th, 2010 at 13:05 | #2

    ખૂબ જ સ-રસ ગીત સુમધુર ગાયકી…

  3. SUJATA
    June 17th, 2010 at 06:09 | #3

    શબ્દો અને સૂર ની સુંદર સમૃદ્ધિ …….

  1. No trackbacks yet.