ભૂલી જવાનો હું જ – કૈલાસ પંડિત

આલ્બમ: આભૂષણ

સ્વર: અનુરાધા પૌંડવાલ, મનહર ઉધાસ

ભૂલી જવાનો હું જ, એ કહેતા હતા મને,
એવું કહીને એ જ તો ભૂલી ગયા મને.

પૂછ્યું નથી શું કોઈએ, મારા વિશે કશું?
તારા વિશે તો કેટલું પૂછે બધા મને!

ચાલો હસીને વાત કરો, એ જ છે ઘણું,
મંજુર છે સૌ આપની એ આજ્ઞા મને.

ભૂલી જવાની વાત હવે યાદ ક્યાં મને?
તારા લખેલા એટલાં પત્રો મળ્યા મને.

થાકી ગયો તો ખૂબ, ના ચાલી શકત જરા,
સારું થયું કે લોક સહુ ઊંચકી ગયા મને.