ઉંચકી સુગંધ એક ઊભું ગુલાબ – ભાગ્યેશ ઝા

સ્વર: સોલી કાપડિયા

ઉંચકી સુગંધ એક ઊભું ગુલાબ
એની વેદનાની વાતોનું શું?
કાંટાંથી છોલાતી લાગણી ને સપનાંઓ
ઉંઘ છતાં જાગવાનું શું?

સુવાસે પડઘાતું આખું આકાશ
છતાં ખાલીપો ખખડે ચોપાસ.
ઉપવનના વાયરામાં કોની છે નોંધ?
કોણ વિણે છે એકલી સુવાસ?
વાયરો કહે તેમ ઉડવાનું આમ-તેમ
વાયરાનું ઠેકાણું શું?

ધારોકે ફૂલ કો’ક ચૂંટે ને સાચવે,
ને આપે ને સુંઘે તો સારું.
ધારો કે એક’દિની જિંદગીમાં મળવાનું,
થોડું લખાય તો ય સારું.
પણ ઉપવનમાં ઝુરવાની હોય જો સજા,
તો મરવાના ખ્વાબોનું શું ?