બસ ઓ નિરાશ દિલ – મરીઝ

સ્વર: સોલી કાપડિયા

“સંગીતમાં છું મસ્ત, સુરામાં તર છું,
માનું છું ગુનાહોનું સળગતું ઘર છું;
પણ તુજથી દરજ્જામાં વધુ છું ઝાહિદ,
દુનિયાથી તું પર છે, તો હું તુજ થી પર છું”

બસ ઓ નિરાશ દિલ, આ હતાશા ખરાબ છે.
લાગે મને કે જગમાં બધા કામયાબ છે.

એમાં જો કોઈ ભાગ ન લે મારી શી કસૂર?
જે પી રહ્યો છું હું તે બધાની શરાબ છે.

કંઇ પણ નથી લખાણ છતાં ભૂલ નીકળી,
કેવી વિચિત્ર પ્રેમની કોરી કિતાબ છે.

બે ચાર ખાસ ચીજ છે જેની જ છે અછત,
બાકી અહીં જગતમાં બધું બેહિસાબ છે.

ખુદને ખરાબ કહેવાની હિંમત નથી રહી,
તેથી બધા કહે છે, જમાનો ખરાબ છે.