પીઠી ચોળી લાડકડી – બાલમુકુન્દ દવે

સ્વર: કૌમુદી મુનશી

પીઠી ચોળી લાડકડી! ચૂંદડી ઓઢી લાડકડી!
ચૂંદડીએ ધબકારા ઢાંક્યાં ને કરમાં કર સોંપ્યા લાડકડી!…

મીઠી આવો લાડકડી! કેમ કહું જાઓ લાડકડી!
તું શાની સાપનો ભારો? તું તુલસીનો ક્યારો લાડકડી!…

ચરકલડી ચાલી લાડકડી! રેહશે ના ઝાલી લાડકડી!
આછેરી શીમળાની છાયા એવી તારી માયા લાડકડી!…

સોડમાં લીધાં લાડકડી! આંખ ભરી પીધાં લાડકડી!
હીબકાંને હૈયામાં રુંધ્યાં! ને પારકાં કીધાં લાડકડી!…