આકંઠ શ્વસી જઈયેં – રાજેન્દ્ર શુક્લ

આલ્બમ: શબ્દનો સ્વરાભિષેક

સ્વરકાર: અમર ભટ્ટ

સ્વર: અમર ભટ્ટ

સામાંય ધસી જઈયેં, આઘાંય ખસી જઈયેં,
એકાદ મળે ક્ષણ તો ક્ષણમાંય વસી જઈયેં!

આમે ય વિતાવવાની છે રાત સરોવરમાં,
તો ચાલ કમલદલમાં આ રાત ફસી જઈયેં!

એકેક કસોટીમાં છે પાર ઊતરવાનું,
હર શ્વાસ કસોટી છે, એનેય કસી જઈયેં!

આ ફીણ તરંગોનાં છે શીખ સમંદરની,
રેતાળ કિનારા પર હેતાળ હસી જઈયેં!

ઉત્કંઠ હવામાં છે સંગાથ સુગંધોનો,
હોવુંય હવે ઉત્સવ, આકંઠ શ્વસી જઈયેં!