ગઝલ એક લખવાની બાકી હજી – આદિલ મન્સુરી

કવિના અવાજમાં પઠન

નજર રાખ પ્યાલીમાં સાકી હજી
ગઝલ એક લખવાની બાકી હજી

હૃદય લઇ બજારે ઉભા ક્યારના
નથી નીકળી શું ઘરાકી હજી

કોઈ છેક દરવાજે આવી ઉભું
છતાં વાત લાગે ન પાકી હજી

સતત એમ લાગે આ અંધારમાં
ઉભું છે કોઈ તીર તાકી હજી

તમે માત્ર સરવાળા કરતા રહ્યા
ને બાકી છે આ બાદબાકી હજી

ચરણ થાકી થાકી ને પાછા પડે
પરંતુ આ હિંમત ન થાકી હજી

અહીં કાળા-ધોળાની વચ્ચે રહી
ત્વચા આપણી એ જ ખાકી હજી