જીવન અંજલી થાજો – કરસનદાસ માણેક

જીવન અંજલી થાજો..
મારું જીવન અંજલી થાજો..

ભૂખ્યાં કાજે ભોજન બનજો, તરસ્યાંનું જળ થાજો,
દીનદુ:ખીયાંનાં આંસુ લોતાં અંતર કદી ન ધરાજો.
મારું જીવન અંજલી થાજો..

સતની કાંટાળી કેડી પર પુષ્પ બની પથરાજો,
ઝેર જગતનાં જીરવી જીરવી અમૃત ઉરનાં પાજો.
મારું જીવન અંજલી થાજો..

વણથાક્યા ચરણો મારા નિત તારી સમીપે ધાજો,
હૈયાના પ્રત્યેક સ્પંદને તારું નામ રટાજો.
મારું જીવન અંજલી થાજો..

વમળોની વચ્ચે નૈયા મુજ હાલકડોલક થાજો,
શ્રદ્ધા કેરો દીપક મારો નવ કદીયે ઓલવાજો.
મારું જીવન અંજલી થાજો..