નથી મળતા – મરીઝ

આલ્બમ: અક્ષર

સ્વર: મનહર ઉધાસ

તને જોયા કરૂં છું પણ મિલન મોકા નથી મળતા,
સિતમ છે, સામે મંઝીલ છે અને રસ્તા નથી મળતા.

નવીનતાને ન ઠુકરાવો, નવીનતા પ્રાણપોષક છે,
જુઓ કુદરત તરફથી શ્વાસ પણ જુનાં નથી મળતા.

ભલા એવા જીવનમાં શું ફળે જીવનની ઇચ્છાઓ,
કે જ્યાં મરજી મુજબનાં નીંદમાં સપના નથી મળતા.

કરી શકતો નથી હું મારા મિત્રોની કદરદાની,
ફકત એ કારણે કે દુશ્મનો સાચા નથી મળતા.

‘મરીઝ’ અલ્લાહનાં એકત્વમાં શંકા પડે ક્યાંથી?
જગતમાં જ્યારે બે ઇન્સાન પણ સરખા નથી મળતા.