હવે મળશું તો સાંજને સુમારે – હર્ષદ ત્રિવેદી

આલ્બમ: સમન્વય ૨૦૦૯

સ્વરકાર: અમર ભટ્ટ

સ્વર: અનાર શાહ

હવે મળશું તો સાંજને સુમારે,
આથમતો સુરજ હો આછો હો ચંદ્રમાં,
અવનિનાં એવા ઓવારે,
હવે મળશું તો..

પગલામાં સહેજે ઉતાવળ ના હોય
અને અમથોય હોય ના ઉચાટ,
એવો ઉમંગ ચઢે દિલને દુવાર
જાણે ઝૂલ્યા કઈ હિંડોળાખાટ.
ચાંદનીના પડછાયા આંખોમાં વિસ્તરતા,
ઝાળ ઝાળ અગ્નિને ઠારે.
હવે મળશું તો..

પોતાની આંખોમાં સુખનો સુરજ લઈ
પંખીઓ ફરવાના પાછાં,
એકાદિ ડાળી કોઈ એકાદા માળામાં,
ઉતરશે અંધારા આછા.
આપણે તો ખીલવાનું મોગરાની જેમ
અને રહેવાનું ક્યારાની ધારે.
હવે મળશું તો..