તમે કોઈ દિવસ પ્રેમમાં પડ્યા છો ? – મુકેશ જોષી

સ્વરકાર: કેદાર ઉપાધ્યાય

સ્વર: કેદાર ઉપાધ્યાય

તમે કોઈ દિવસ પ્રેમમાં પડ્યા છો ?
એકાદી મુઠ્ઠીનું અજવાળું આપવા આખીયે જિંદગી બળ્યા છો ?

તમે લોહીઝાણ ટેરવા હોય તોય કોઈના મારગથી કાંટાઓ શોધ્યાં ?
તમે લીલેરા છાંયડાઓ આપીને કોઈના તડકાઓ અંગ ઉપર ઓઢ્યાં ?
તમે એકવાર એનામાં ખોવાયા બાદ કદી પોતાની જાતને જડ્યાં છો ?
તમે કોઈ દિવસ પ્રેમમાં પડ્યા છો ?

તમે કોઈની આંખ્યુંમાં વીજના કડાકાથી ખુદમાં વરસાદ થતો જોયો ?
તમે કોઈના આભને મેઘધનુષ આપવા પોતાનાસુરજને ખોયો ?
તમે મંદિરની ભીંત ઉપર કોઈની જુદાઈમાં માથું મૂકીને રડ્યા છો?
તમે કોઈ દિવસ પ્રેમમાં પડ્યા છો ?