છૂંદણા – ચિંતન નાયક

આલ્બમ: શબ્દ પેલે પાર

સ્વરકાર: પરેશ નાયક

સ્વર: હિમાલી વ્યાસ નાયક

છૂંદણા છૂંદીને હું તો મૂઈ મૂઈ વા’લમા,
છૂંદણા છૂંદીને હું તો મૂઈ..
થોકબંધ ટહુકાઓ આઘા ઠેલા ને તોય,
પડઘાતી અંતરની કૂઈ..
છૂંદણા છૂંદીને હું તો મૂઈ..

ગામતર આંખુયે વાત્યુંનો વગાડો
ને મહેરામણ મેહણાનો હેમ,
એમાં હું અપલખણી ગાગર લઈ હાલી
ને છલકાતી આંખે સીમ,
પગથીમાં પથરાતા રણકાને નીંદે છે
વડલાઓ સખીઓ ને ફૂઈ..
છૂંદણા છૂંદીને હું તો મૂઈ..

ખાતરમાં લાલ લાલ ચાસ પડે એવા
કે આથમણા ઉગમણા લાગે,
મેળે માહલ્યાની વેળ મેડીએ મૂકી
ને તોયે ભણકારા ભીંતોને ભાંગે,
મહેકી મહેકીને મને અધમૂઈ કરતી
આ મારાતે આંગણાની જૂઈ..
છૂંદણા છૂંદીને હું તો મૂઈ..