આપી આપીને – વિનોદ જોષી

આલ્બમ: શબ્દ પેલે પાર

સ્વરકાર: પરેશ નાયક

સ્વર: માલિની પંડિત નાયક

આપી આપીને તમે પીંછું આપો સજન,
પાંખો આપો તો અમે આવીએ..

ચાંદો નીચોવી અમે વાટકા ભર્યા
ને એને મોગરાની કળીએ હલાવ્યાં;
આટલા ઉઝરડાને શમણું ઓઢાડી
અમે ઊંબરની કોર લાગી લાવ્યા.

આપી આપીને તમે ટેકો આપો સજન,
નાતો આપો તો અમે આવીએ..

કાગળમાં કાળઝાળ રેતી વીંઝાય
અને લેખણમાં બેઠી છે લૂ;
આંગળિયું ઓગળીને અટકળ થઇ જાય
અમે લખીએ તો લખીએ પણ શું?

આપી આપીને તમે આંસુ આપો સજન,
આંખો આપો તો અમે આવીએ..