સમી સાંજનો ઢોલ ઢબૂકતો – અનિલ જોશી

સ્વરકાર: પુરષોત્તમ ઉપાધ્યાય

સ્વર: રાહુલ શાહ

સમી સાંજનો ઢોલ ઢબૂકતો જાન ઉઘલતી મ્હાલે,
કેસરિયાળો સાફો ઘરનું ફળિયું લઈને ચાલે.

પાદર બેસી ફફડી ઊઠતી
ઘરચોળાની ભાત,
ડૂસકે ડૂસકે હડસેલાતી
બાળપણાની વાત.
સમી સાંજનો ઢોલ ઢબૂકતો …

પૈડું સીંચતા રસ્તો આખો
કોલાહલમાં ડૂબે,
શૈશવથી ચીતરેલી શેરી
સૂનકારમાં ડૂબે.
સમી સાંજનો ઢોલ ઢબૂકતો …

જાન વળાવી પાછો ફરતો
દીવડો થરથર કંપે,
ખડકી પાછળ ઊભો રહીને
અજવાળાને ઝંખે.
સમી સાંજનો ઢોલ ઢબૂકતો …