આંખોથી લઇશું કામ હવે – સૈફ પાલનપુરી

એક રાતે ભર સભામાં મારી ગઝલો સાંભળી
એક ગભરુ નારના ગાલો ગુલાબી થઇ ગયાં
દ્રશ્ય આ રંગીન જોઇ શાયરોના જુથમાં
જે શરાબી ન હતા તે પણ શરાબી થઇ ગયા.

આંખોથી લઇશું કામ હવે બોલવું નથી
રૂપાળું એક નામ, હવે બોલવું નથી
આંખોથી લઇશું કામ…

યૌવનમાં એક રેશમી સાહસ કર્યું હતું
કેવું મળ્યું ઇનામ, હવે બોલવું નથી
આંખોથી લઇશું કામ…

પૂછોના પ્રિત મોંઘી કે સસ્તી છે દોસ્તો
ચુકવી દિધાં છે દામ, હવે બોલવું નથી
આંખોથી લઇશું કામ…

લ્યો સામે પક્ષે ‘સૈફ’ નજર નીચી થઇ ગઇ
શબ્દો હવે હરામ, બોલવું નથી
આંખોથી લઇશું કામ…