અહો ! પુષ્પપુષ્પે પ્રગટ પ્રેમલિપિ – ઉમાશંકર જોશી

આલ્બમ: સમન્વય ૨૦૧૧

સ્વરકાર: અમર ભટ્ટ

સ્વર: ગાર્ગી વોરા

અહો ! પુષ્પપુષ્પે પ્રગટ પ્રેમલિપિ !
દિશાએ દિશાએ રહે દિવ્ય દીપી !
તૃણ તણે અંકુરે પ્રેમભાષા સ્ફુરે,
કોમળા અક્ષરોમાં લખેલી;
વાડીએ, ઝાડીએ, ખેતરે, કોતરે,
વાદળીપિચ્છમાં આળખેલી.
અહો ! પુષ્પપુષ્પે પ્રગટ પ્રેમલિપિ !
દિશાએ દિશાએ રહે દિવ્ય દીપી !

પંખીની હારમાં, સરિતની ચાલમાં,
સિન્ધુના ઊછળતા જળતરંગે,
એ જ ગાથા લખી ભવ્ય ગિરિશ્રેણિમાં,
તારકાંકિત નિશાને ઉછંગે.
અહો ! પુષ્પપુષ્પે પ્રગટ પ્રેમલિપિ !
દિશાએ દિશાએ રહે દિવ્ય દીપી !

તરુણ જનની કૂખે, અરુણ બાલક મુખે.
સ્મિતપીંછીથી રચી પ્રણયરૂપી;
મૃત્યુની લેખણે વૃધ્ધ રોગી તણે
મુખ લખી કારુણી એ અછૂપી.
અહો ! પુષ્પપુષ્પે પ્રગટ પ્રેમલિપિ !
દિશાએ દિશાએ રહે દિવ્ય દીપી !

ઊલટતા નાશમાં, પલટતી આશમાં
અગનઝાળે ગૂંથી ચીપીચીપી;
ભૂત ને ભાવિના ભવ્ય ભાવાર્થમાં
ભભકતી અજબઘેરાં અમી પી.
અહો ! પુષ્પપુષ્પે પ્રગટ પ્રેમલિપિ !
દિશાએ દિશાએ રહે દિવ્ય દીપી !