માડી તારુ કંકુ ખર્યું ને સુરજ ઊગ્યો – અવિનાશ વ્યાસ

સ્વર: આશા ભોંસલે



માડી તારુ કંકુ ખર્યું ને સુરજ ઊગ્યો
જગ માથે જાણે પ્રભુતાએ પગ મૂક્યો.

મંદિર સર્જાયું ને ઘંટારવ જાગ્યો
નભનો ચંદરવો માંએ આંખ્યુમાં આંજ્યો
દીવો થાવા મંદિરનો ચાંદો આવી પૂગ્યો
કંકુ ખર્યું ને સુરજ ઊગ્યો…

માવડીની કોટમાં તારાના મોતી
જનનીની આંખ્યુંમાં પૂનમની જ્યોતિ
છડી રે પુકારી માંની મોરલો ટહુક્યો
કંકુ ખર્યું ને સુરજ ઊગ્યો…

નોરતાંનાં રથનાં ઘૂઘરા રે બોલ્યા
અજવાળી રાતે માંએ અમરત ઢોળ્યાં
ગગનનો ગરબો માંનાં ચરણોમાં ઝૂક્યો
કંકુ ખર્યું ને સુરજ ઊગ્યો…