અમસ્તી મારી મહેનત પર – અઝીઝ કાદરી
March 28th, 2008
7 comments
સ્વર: મનહર ઉધાસ
Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.
“કિસ્મતને હથેલીમાં હંમેશા રાખો,
ચહેરાની ઉપર ન એની રેખા રાખો;
દેવાને દિલાસો કોઈ હિંમત ના કરે,
દુ:ખ દર્દમાં પણ એવી પ્રતિભા રાખો.”
અમસ્તી મારી મહેનત પર ઘડીભર તો નજર કરજો,
કહું છું ક્યાં કદી હું કોઈને મારી કદર કરજો.
તમે અશ્રુ બહાવી દુ:ખમાં ના આંખોને તર કરજો,
મરદની જેમ જીવન જીવતાં રહેજો, સબર કરજો.
તમે કંટાળશો ના ઠોકરોથી માર્ગની સહેજે,
ખુમારી સાથે હસતું મોઢું રાખીને સફર કરજો.
સુખે તો જીવવા દીધો નહીં, લોકો મરણ વેળા,
મને માટીમાં મેળવવા હવે ભેગું નગર કરજો.
કરે ફરીયાદ ના મિત્રો કે આમંત્રણ નથી આપ્યું,
‘અઝીઝ’ અંતિમ પ્રવાસે જાય છે આજે ખબર કરજો.
