સ્વર: અલ્કા યાજ્ઞિક

ના બોલાય રે ના બોલાય
એક અમી ભરપુર ઉરે તવ સોમલ કેમ ઘોળાય રે..
ના બોલાય રે..

તારે હાથે પ્રીય મેં જ ધર્યો હતો મહેંદી એ રંગીન હાથ,
અંગથી અંગ અડાડી ભર્યા નીલ કુંજ મહીં ડગ સાત.
રંગ સુગંધની સોડ તણી અવ વાદ કેમ ખોલાય રે..
ના બોલાય રે..

સ્હેજ અડી મૃદુ આંગળી ત્યાં રણકે મધુરો ઝણકાર,
એજ વીણા તણી તાંત તૂટી, બનીયો મુક રે અવતાર.
પાણી મહીં નહીં, આસું મહીં નહીં ઠાલવું અંતર આજ,
આગની સંગ ઉમંગ ભર્યો લહુ જીવનનો અનુરાગ.
પ્રેમપ્રીયા તવ પૂજન ભૂલશો આજમાં કેમ રોળાય રે..
ના બોલાય રે..

સ્વર: પ્રફુલ દવે, અલ્કા યાજ્ઞીક

ઓઢણી ઓઢું ઓઢું ને ઉડી જાય,
ના ના રે રહેવાય, ના ના રે સહેવાય,
ના કોઈ ને કહેવાય..

ઓઢણી ઉડે તો ભલે ઉડી જાય,
તારું મુખડું મલકાય, તારું જોબન છલકાય,
મારાં હૈયામાં કૈં કૈં થાય..
ઓઢણી ઓઢું ઓઢું ને ઉડી જાય..

ઓ રે ઓ રે મેઘ વરસે ને ભીંજે ચીર..
હાય હાય હાય વાગે તીર, વાગે તીર.
ઓ રે ઓ રે તારું ચંદંન સરીખું શરીર,
હાય હાય હાય નીતરે નીર, નીતરે નીર.
રૂપ દૂર થી જોવાય, ના ના રે અડકાય,
ઇ તો અડતા કરમાય..
ઓઢણી ઓઢું ઓઢું ને ઉડી જાય..

ઓ.. મારે નેણ લજ્જા લહેરે છે..
હો.. તારા રૂપ ની ભીનાશ તને ઘેરે છે.
હું તો સંકોરુ કાય, અંગ અંગથી ભીંસાય,
મને મરવાનું થાય..
ઓઢણી ઓઢું ઓઢું ને ઉડી જાય..

હાય રે.. ઓલી વીજળી કરે ચમકાર,
હાય હાય હાય વારંવાર..
ઓ રે.. ઈ તો હૈયાનાં સાંધે તાર,
હોયે હોયે હોયે નમણી નાર..
મારું મનડું મુંજાય, એવે લાગી રે લ્હાય
ના ના રે બુજાય..
ઓઢણી ઓઢું ઓઢું ને ઉડી જાય..

સ્વર: અલ્કા યાજ્ઞીક

વહેલી સવારે હું તો ભીની થઈ,
બની ઝાકળ તું ક્યાં ક્યાં અડકે.
વરસાદ તું ક્યાંયે ના કેમ આજે વરસે?

ભીની તરબોળ થઈ પાલવ નીચોવતાં,
નૈનોનાં નીર બની ટપકે.
વરસાદ તું ક્યાંયે ના કેમ આજે વરસે?

કૂવે ગઈ’તી હું પાણીડા ભરવા,
ગાગરનાં જળમાં તું છલકે.
વરસાદ તું ક્યાંયે ના કેમ આજે વરસે?

બળબળતા તાપમાં રણમાં ખોવાણી હું,
મૃગજળનું ટીપું થઈ ચમકે.
વરસાદ તું ક્યાંયે ના કેમ આજે વરસે?

સાજનની વાટ જોઈ ચોમાસા વીતે,
એની યાદો તો રોજ રોજ વરસે.
વરસાદ તું ક્યાંયે ના કેમ આજે વરસે?

શ્યામ તણો રંગ લઈ મેઘમાં છૂપાયો તું,
રાધા સંગ રાસ રમી મલકે,
વરસાદ તું ક્યાંયે ના કેમ આજે વરસે?

સ્વરાંકન: ક્ષેમુ દિવેટીઆ
સંગીત: ગૌરાંગ વ્યાસ, આશીત દેસાઈ
સ્વર: અલ્કા યાજ્ઞીક

નૈણા રંગ રૂપાળાં,
કમલ નહીં, નહીં હરિણ વીન સમ,
અનુપમ રસરળીયાળા રે.. નૈણા રંગ રૂપાળાં..

કાજળનાં નવા આંજ્યા અંજન,
તોય કાળજા રંજન રંજન,
પલક ગંભીર, પલક શા ચંચળ,
પલનીજ પલક નીરાળા રે.. નૈણા રંગ રૂપાળાં..

મીટ માંડતા સરતા શમણા,
મીચું પોપચાં ઉઘડે નમણા,
અધબીડ્યાં ખોલ્યાની મધુરપ,
મનમોહે મર્માળા રે.. નૈણા રંગ રૂપાળાં..