આજ વગડાવો વગડાવો રૂડાં શરણાયું ને ઢોલ
શરણાયું ને ઢોલ નગારા… શરણાયું ને ઢોલ..

આજ અજવાળી અજવાળી રૂડી રાતડી રે..
સખી રઢિયાળી રઢિયાળી કહો વાતડી રે..
મને આંખડીમાં દીધાં ખુલ્લા જન્મોનાં કોડ.
આજ વગડાવો વગડાવો રૂડાં શરણાયું ને ઢોલ..

આજ નાચે રે ઉમંગ અંગ અંગમાં રે.
હું કે ‘દી રંગાણી એના રંગમાં રે..
હું તો બંધાણી સખી એની નજર્યું ને દોર..
આજ વગડાવો વગડાવો રૂડાં શરણાયું ને ઢોલ..

મૈયરની માયા છોડી, સાસરીયે જાય,
નાનેથી ઉછેરી હવે પારકી થઈ જાય;
આવી જગની રીત કોઈથી કાંઈના કહેવાય,
દીકરી ને ગાય બેઉ દોરે ત્યાં જાય.

એક બાજુ ખુશી થતી, આનંદ અપાર,
બીજી બાજુ આંખેથી આંસુડાની ધાર;
શરણાઈનાં સૂર હવે ઘેરા ઘેરા સંભળાય,
વસમી છે વિદાય.. મૈયરની માયા..

માતાની મમતાને પિતાનો પ્યાર,
છોડી બધું જાય અનો ઉર ઊભરાય;
વિદાય લઈને લાડકી દીકરી માંડવેથી જાય,
વસમી છે વિદાય.. મૈયરની માયા..

બાંધવ રોવે ને બેનડી રોવે,
હસી-હસી રડી-રડી સામું એતો જોવે;
આવજો કહેતાં આંખે આંસુ ના સમાય,
વસમી છે વિદાય.. મૈયરની માયા..

દઉં છું આશિષ દીકરી અંબા કરશે સહાય,
અખંડ એવાતણ તારું રહેજો સદાય,
સુખી થાજો દીકરી હવે ભુલ્યું ના ભુલાય,
વસમી છે વિદાય.. મૈયરની માયા..

આલ્બમ: હસ્તાક્ષર
સ્વર: દિપાલી સોમૈયા

દાદાના આંગણામાં કોળેલા આંબાનું કૂણેરું તોડ્યું રે પાન,
પરદેશી પંખીના ઊડ્યા મુકામ પછી માળામાં ફરક્યું વેરાન!

ખોળો વાળીને હજુ રમતાં’તાં કાલ અહીં,
સૈયરના દાવ નતા ઉતર્યા;
સૈયરના પકડીને હાથ ફર્યા ફેર-ફેર,
ફેર હજી એ ન’તા ઉતર્યા;
આમ પાનેતર પહેર્યું ને ઘૂંઘટમાં ડોકાયું,
જોબનનું થનગનતું ગાન!
પરદેશી પંખીના ઊડ્યા મુકામ પછી માળામાં ફરક્યું વેરાન!

આંગળીએ વળગેલાં સંભાર્યા બાળપણાં,
પોઢેલાં હાલરડાં જાગ્યાં;
કુંવારા દિવસોએ ચોરીમાં આવીને,
ભૂલી જવાના વેણ માગ્યાં!
પછી હૈયામાં, કાજળમાં, સેંથામાં સંતાતું,
ચોરી ગયું રે કોઈ ભાન!
પરદેશી પંખીના ઊડ્યા મુકામ પછી માળામાં ફરક્યું વેરાન!

કન્યા છે કંઈ માણેકડું ને વર મોતીનો દાણો રે,
કન્યા કાગળ મોકલે, તમે રાયવર વહેલાં આવો રે..

હું કેમ આવું? મારા દાદાજી રીસાણા રે,
તમાર દાદાને પાઘડી પહેરામણી,
તમે રાયવર વહેલાં આવો રે.. કન્યા છે..

હું કેમ આવું? મારા પિતાજી રીસાણા રે,
તમારા પિતાને ખેસની પહેરામણી,
તમે રાયવર વહેલાં આવો રે.. કન્યા છે..

હું કેમ આવું? મારા માતાજી રીસાણા રે,
તમારી માતાને સેલા ની પહેરામણી,
તમે રાયવર વહેલાં આવો રે.. કન્યા છે..

હું કેમ આવું? મારા બેનીબા રીસાણા રે,
તમારી બેની ને સોળે શણગાર,
તમે રાયવર વહેલાં આવો રે.. કન્યા છે..

હું કેમ આવું? મારા વિરાજી રીસાણા રે,
તમારા વિરાને સુટ ની પહેરામણી,
તમે રાયવર વહેલાં આવો રે.. કન્યા છે..
——————————–
ફરમાઈશ કરનાર મિત્ર: ધ્વનિ

સ્વર: લતા મંગેશકર

બેના રે..
સાસરીયે જાતાં જોજો પાંપણના ભીંજાય
દીકરીતો પારકી થાપણ કહેવાય
દીકરી ને ગાય, દોરે ત્યાં જાય
દીકરીતો પારકી થાપણ કહેવાય

બેની તારી માથે બાપનો હાથ હવે નહી ફરશે
રમતી તું જે ઘરમાં એની ભીંતે-ભીંતો રડશે
બેના રે.. વિદાયની આ વસમીવેળા રોકે ના રોકાય
દીકરી તો પારકી થાપણ કહેવાય

તારા પતિનો પડછાયો થઈ, રહેજે સદાયે સાથે
સોહાગી કંકુ સેંથામાં, કંકણ શોભે હાથે
બેના રે.. તારી આ વેણીનાં ફૂલો કોઈ દિ ના કરમાય
દીકરી તો પારકી થાપણ કહેવાય

આમ જુઓ તો આંસુ સૌનું પાણી જેવું પાણી
સુખનું છે કે દુ:ખનું એતો કોઈ શક્યું ના જાણી
બેના રે.. રામ કરે સુખ તારું કોઈ દિ નજર્યું ના નજરાય
દીકરી તો પારકી થાપણ કહેવાય

દીકરી ને ગાય, દોરે ત્યાં જાય
દીકરી તો પારકી થાપણ કહેવાય
—————————
ફરમાઈશ કરનાર મિત્રો: ધ્વનિ, મંથન

પહેલું પહેલું મંગળીયું વરતાય રે
પહેલે મંગળ ગાયોનાં દાન દેવાય રે
અગ્નિદેવની સાક્ષીએ ફેરા ફરાય રે
સૌને હૈયે આનંદ અતિ ઉભરાય રે

બીજું બીજું મંગળીયું વરતાય રે
બીજે મંગળ રૂપાનાં દાન દેવાય રે
માંડવડાનાં મંગળ ગીતો ગવાય રે
શુભદિન આજે શુકનનો કહેવાય રે

ત્રીજું ત્રીજું મંગળીયું વરતાય રે
ત્રીજે મંગળ સોનાનાં દાન દેવાય રે
ફુલડાં કેરી ફોરમ બધે પ્રસરાય રે
બન્ને પક્ષે આનંદ અતિ ઉભરાય રે

ચોથું ચોથું મંગળીયું વરતાય રે
ચોથે મંગળ કન્યાનાં દાન દેવાય રે
અગ્નિદેવની સાક્ષીએ ફેરા ફરાય રે
માંડવડાનાં મંગળ ગીતો ગવાય રે
—————————–
ફરમાઇશ કરનાર મિત્ર: ધ્વની

સ્વર: દેવીયાની પટેલ

તને સાચવે પાર્વતી, અખંડ સૈભાગ્યવતી
તને સાચવે સીતા સતી, અખંડ સૌભાગ્યવતી

માના ખોળા સમું આંગણું તેં મુક્યું
બાપના મન સમું બારણું તેં મુક્યું
તું તો પારકા ઘરની થતી, અખંડ સૌભાગ્યવતી

ભગવાન ને આજ ધરાવી દિધી
વિશ્વાસ કરીને વળાવી દિધી
તારો સાચો સગો છે પતિ, અખંડ સૌભાગ્યવતી
————————————————–
ફરમાઇશ કરનાર મિત્ર: દિગીશા

આપણા ત્યાં લગ્નો માં ફટાણાં ગાવાનો રીવાજ છે…. રજુ કરુ છું એવું જ એક ગીત…
સ્વર: નિશા ઉપાધ્યાય, પ્રફુલ દવે

મારે આંગણીયે તલાવડી, છબછબીયા પાણી
એમાં તે અણવર લપસ્યો રે એની કેડ લચકાણી

વેવાઇને માંડવે વેવલી રે એની આંખ છે કાંણી
નદીએ ના’વા ગઇતી રે એને દેડકે તાણી

દોડજો છોકરા દોડજો એની કેડ લચકાણી
ગોળને બદલે ખોળ દ્યો રે એની કેડ લચકાણી

અણવીતરી તો એવી એની અવળી વાણી
એણે ચોરીને ચિભડું ખાધુ રે
એણે ચોરીને ચુરમું ખાધુ રે
એણે ચોરીને ચટણી ચાખી રે
ખાઉ ખાઉ કરતી ફરતી રે, જાણે ભેંસની ભાણી

ઓલ્યા અણવરને જાનમાંથી કાઢો રે હું તો લાજી મરું
એના હાથ હિડંબા જેવા, એના પગ હિડંબા જેવા
એનું માથુ બુજારા જેવું, હું તો લાજી મરું

ઓલી વેવલીને માંડવેથી કાઢો રે હું તો લાજી મરું
એનું નાક નળીયા જેવું, એનો ફાંદો ફળીયા જેવો
એલી કાળીનો કાંકરો કાઢો રે હું તો લાજી મરું

તું થોડું જમજે રે કે અણવર અધરાયો
તારા પેટડામાં દુખશે રે કે અણવર અધરાયો
એક આંકડાની ડાળ, એક લીંબડાની ડાળ
માંયે લસણ કળી, માંયે થેલમ વડી
માંયે મરચું મેલો રે કે અણવર અધરાયો

તને રાંધતા આવડે નહી કે વેવલી વંઠેલી
તુ તો શીરા મા નાખે દહીં કે વેવલી વંઠેલી
પુરણપોળી કરી છાશમા બોળી
તુ તો મીઠે મોળી,પાછી થાય છે ભોળી
તને વેચે તો મળે ન પાઇ કે વેવલી વંઠેલી

તું થોડું જમજે રે કે અણવર અધરાયો
તને રાંધતા આવડે નહી કે વેવલી વંઠેલી